TRENDING NOW

Recent News

News

Recent Post Recent Post
View More

Posted at 0

ادارے کی تعلیمی و انتظامی ٹیم کی مشترکہ کاوشوں کا نتیجہ, مستقبل میں بھی قوم و ملک کی خدمت کا عزم

مالیگاؤں (پریس ریلیز) جامعہ محمدیہ ایجوکیشن سوسائٹی (منصورہ) کے زیرِ انصرام جاری مولانا مختار احمد ٹیکنیکل کیمپس (MMANTC)، المعروف منصورہ انجینئرنگ کالج کو تعلیمی میدان میں نمایاں خدمات، بہترین کارکردگی اور معیارِ تعلیم کے فروغ کے اعتراف میں باوقار ’’PRIDE OF NATION Award-2026‘‘ سے نوازا گیا۔

یہ باوقار اعزاز جامعہ محمدیہ ایجوکیشن سوسائٹی کے معزز سیکریٹری جناب راشد ارشد مختار نے ادارے کی جانب سے حاصل کیا۔ PRIDE OF NATION Award-2026 کی تقریب 20 اگست 2026 کو ایشیا ٹوڈے میڈیا کے زیرِ اہتمام اورنگ آباد (چھترپتی سمبھاجی نگر)، مہاراشٹر میں منعقد ہوئی۔

یہ اعزاز منصورہ انجینئرنگ کالج کے اساتذہ، غیر تدریسی عملے اور طلبہ کی مسلسل محنت، تعلیمی معیار کو مزید بہتر بنانے کی کاوشوں، طلبہ کی مؤثر رہنمائی اور ادارے کی مجموعی ترقی کے لیے انجام دی جانے والی انتھک خدمات کا اعتراف ہے۔

اس اعزاز پر جامعہ محمدیہ ایجوکیشن سوسائٹی کے معزز چیئرمین جناب ارشد مختار صاحب نے منصورہ انجینئرنگ کالج کے تمام اساتذہ، غیر تدریسی عملے اور طلبہ کو دلی مبارکباد پیش کی اور اسے ادارے کی تعلیمی و انتظامی ٹیم کی مشترکہ کاوشوں کا نتیجہ قرار دیا۔

ادارے سے وابستہ افراد نے اس اعزاز کو اپنے لیے باعثِ فخر قرار دیتے ہوئے مستقبل میں بھی اعلیٰ تعلیمی معیار، تحقیق، طلبہ کی ہمہ جہت ترقی اور قوم و ملک کی خدمت کے عزم کا اظہار کیا۔

Continue reading

Posted at 0

اقلیتی طلبہ کیلئے اسکالرشپ اور مالیگاؤں حج ہاؤس کی تعمیر کیلئے ممبئی میں نمائندگی

مالیگاؤں: مالیگاؤں کے سابق رکن اسمبلی، اسلام پارٹی کے بانی و قائد آصف شیخ رشید نے آج ممبئی میں مہاراشٹر کی نائب وزیر اعلیٰ و وزیر اقلیت سنیترا تائی پوار سے ملاقات کی اور مالیگاؤں شہر کے مختلف اہم مسائل کے حل، بنیادی سہولیات کی ترقی اور اقلیتی طلبہ کے تعلیمی مستقبل کے حوالے سے اہم مطالبات پیش کیے۔ملاقات کے دوران آصف شیخ رشید نے کہا کہ مالیگاؤں ایک اہم اقلیتی شہر ہے، جہاں بڑی تعداد میں غریب اور متوسط طبقے کے افراد زندگی بسر کرتے ہیں۔ انہوں نے کہا کہ شہر میں روزگار اور آمدنی کے محدود ذرائع کے باعث شہریوں کی معاشی حالت انتہائی کمزور ہے اور مالیگاؤں کی ترقی کا بڑا انحصار سرکاری امداد اور خصوصی گرانٹس پر ہے۔انہوں نے نائب وزیر اعلیٰ سے مطالبہ کیا کہ مالیگاؤں شہر کے بنیادی مسائل، سڑکوں، پانی، صفائی، صحت، تعلیم اور دیگر ضروری شہری سہولیات کی بہتری کے لیے کروڑوں روپے کی خصوصی ترقیاتی گرانٹ منظور کی جائے، تاکہ شہر میں جاری ترقیاتی کاموں کو رفتار دی جاسکے اور عوام کو بنیادی سہولیات فراہم کی جاسکیں۔

آصف شیخ نے مالیگاؤں میں ریجنل حج ہاؤس کی تعمیر کا مطالبہ بھی نائب وزیر اعلیٰ سنیترا پوار کے سامنے رکھا۔ انہوں نے کہا کہ مالیگاؤں نہ صرف ناسک ضلع بلکہ جلگاؤں، دھولیہ اور نندوربار سمیت اطراف کے علاقوں کے لیے بھی ایک اہم مرکزی شہر ہے، جہاں بڑی تعداد میں مسلم آبادی آباد ہے۔

انہوں نے کہا کہ ان علاقوں سے ہر سال بڑی تعداد میں عازمینِ حج سفرِ حج پر روانہ ہوتے ہیں، لیکن حج سے متعلق ضروری سہولیات کے لیے انہیں دور دراز مقامات کا رخ کرنا پڑتا ہے۔ اگر مالیگاؤں میں ریجنل حج ہاؤس قائم کیا جاتا ہے تو مالیگاؤں کے ساتھ ساتھ اطراف کے اضلاع کے عازمینِ حج کو بھی بڑی سہولت حاصل ہوگی۔

آصف شیخ نے مطالبہ کیا کہ حکومت مالیگاؤں میں حج ہاؤس کی تعمیر کے لیے ضروری منظوری اور فنڈز فراہم کرتے ہوئے اس منصوبے کو جلد عملی شکل دے۔

ملاقات میں آصف شیخ نے اقلیتی طلبہ کی تعلیمی مشکلات کا مسئلہ بھی تفصیل سے پیش کیا۔ انہوں نے مطالبہ کیا کہ مہاراشٹر حکومت اقلیتی طلبہ کے لیے اسکالرشپ کا دائرہ وسیع کرے، خصوصاً ہائر ایجوکیشن حاصل کرنے والے طلبہ کے لیے خصوصی مالی امداد کا انتظام کیا جائے۔

انہوں نے کہا کہ مالی مشکلات کے باعث کئی باصلاحیت طلبہ اعلیٰ تعلیم جاری رکھنے سے محروم رہ جاتے ہیں۔ ایسے طلبہ کو حکومت کی جانب سے لاکھوں روپے تک کی اسکالرشپ فراہم کی جائے تو وہ اپنی تعلیم مکمل کرکے بہتر مستقبل کی جانب گامزن ہوسکتے ہیں اور ملک و ریاست کی ترقی میں مؤثر کردار ادا کرسکتے ہیں۔ملاقات کے دوران نائب وزیر اعلیٰ و وزیر اقلیت سنیترا تائی پوار نے آصف شیخ رشید کی جانب سے پیش کیے گئے مطالبات پر مثبت تیقن دیتے ہوئے کہا کہ حکومت ان معاملات کو سنجیدگی سے دیکھ رہی ہے اور متعلقہ امور پر ضروری کارروائی کی جائے گی۔

آصف شیخ رشید نے امید ظاہر کی کہ نائب وزیر اعلیٰ کی مثبت یقین دہانی کے بعد مالیگاؤں کے لیے خصوصی ترقیاتی گرانٹ، ریجنل حج ہاؤس کی تعمیر اور اقلیتی طلبہ کے لیے اعلیٰ تعلیمی اسکالرشپ کے مطالبات پر جلد عملی پیش رفت ہوگی۔

Continue reading

Posted at 0

دو جاں بحق، 15 سے 20 زخمی,بعض زخمیوں کی حالت تشویشناک

مالیگاؤں: مالیگاؤں–چالیسگاؤں روڈ پر بدھ کی صبح ایک دل دہلا دینے والے سڑک حادثے میں دو افراد جاں بحق جبکہ 15 سے 20 افراد زخمی ہوگئے۔ یہ حادثہ مالیگاؤں تعلقہ پولیس اسٹیشن کی حدود میں دہیواڑ گاؤں کے قریب تقریباً ساڑھے دس بجے پیش آیا۔

موصولہ اطلاعات کے مطابق مالیگاؤں سے چالیسگاؤں کی جانب جانے والی بس اور مخالف سمت سے آنے والے ایسر ٹرک کے درمیان سرِراہ زوردار تصادم ہوگیا۔ ٹکر اتنی شدید تھی کہ دونوں گاڑیوں کو شدید نقصان پہنچا اور بس تقریباً مکمل طور پر تباہ ہوگئی۔

حادثے کی شدت کا اندازہ اس بات سے لگایا جاسکتا ہے کہ بس کا اسٹیئرنگ وہیل ڈرائیور کی سیٹ سے آگے بڑھ کر پہلی سیٹ تک جا پہنچا، جبکہ بس کے تقریباً تمام سیٹ اپنی جگہ سے اکھڑ گئے۔ حادثے کے بعد موقع پر چیخ و پکار مچ گئی اور مقامی افراد نے فوری طور پر امدادی کارروائی شروع کی۔

پولیس کے مطابق حادثے میں دو افراد کی موت واقع ہوئی ہے، جبکہ 15 سے 20 افراد زخمی ہوئے ہیں۔ زخمیوں کو فوری طور پر قریبی اسپتال منتقل کیا گیا، جہاں ان کا علاج جاری ہے۔ بعض زخمیوں کی حالت تشویشناک بتائی جارہی ہے۔

حادثے کی اطلاع ملتے ہی مالیگاؤں تعلقہ پولیس موقع پر پہنچ گئی اور جائے حادثہ کا جائزہ لیتے ہوئے ضروری کارروائی شروع کردی۔ پولیس کی جانب سے حادثے کی اصل وجہ معلوم کرنے کے لیے تحقیقات کی جارہی ہیں۔ فی الحال یہ واضح نہیں ہوسکا ہے کہ حادثے کے لیے کس گاڑی کے ڈرائیور کی غفلت ذمہ دار تھی۔

پولیس حکام نے شہریوں سے اپیل کی ہے کہ اگر ان کے کسی رشتہ دار یا عزیز کا اس بس میں سفر کرنا معلوم ہو تو وہ متعلقہ اسپتال پہنچ کر زخمیوں اور جاں بحق افراد کی شناخت میں تعاون کریں اور متاثرین کو ضروری طبی و دیگر مدد فراہم کریں۔

اس المناک حادثے کی خبر پھیلتے ہی مالیگاؤں اور اطراف کے علاقوں میں غم و تشویش کی لہر دوڑ گئی۔ پولیس معاملے کی مزید تفتیش میں مصروف ہے اور حادثے سے متعلق مزید تفصیلات تحقیقات مکمل ہونے کے بعد سامنے آنے کی توقع ہے۔

Continue reading

Posted at 0

 دو کروڑ سے زائد ووٹروں کے انومریشن فارم جمع نہیں ہوئے

ممبئی: مہاراشٹر میں ووٹر لسٹ کی خصوصی گہری نظرثانی (SIR) کے تحت گنتی فارم جمع کرنے کا مرحلہ مکمل ہوگیا ہے،تاہم ریاست میں 2 کروڑ 7 لاکھ 93 ہزار 916 ووٹروں کے گنتی فارم ابھی تک جمع یا اسکین نہیں ہو سکے ہیں۔ چیف الیکشن آفیسر کے دفتر کی جانب سے 17 اگست 2026 کو جاری کردہ اعداد و شمار میں یہ اہم معلومات سامنے آئی ہے۔تفصیلات کے مطابق ریاست میں مجموعی طور پر 9 کروڑ 78 لاکھ 54 ہزار 49 ووٹر درج ہیں۔ ان میں سے 7 کروڑ 69 لاکھ 52 ہزار 262 ووٹروں کے گنتی فارم ڈیجیٹائز کیے جا چکے ہیں، جو مجموعی ووٹروں کا 78.64 فیصد ہے۔ جبکہ 21.25 فیصد یعنی 2 کروڑ سے زائد ووٹروں کے فارم ابھی تک جمع نہیں ہوئے ہیں۔

دوسری جانب، ڈیجیٹائز کیے گئے فارم اور ابھی تک جمع نہ ہونے والے فارم کو ملا کر 9 کروڑ 77 لاکھ 46 ہزار 178 ووٹروں کا ڈیٹا آن لائن عمل میں شامل ہو چکا ہے، جو ریاست کے کل ووٹروں کا تقریباً 99.89 فیصد بنتا ہے۔الیکشن حکام نے واضح کیا ہے کہ گنتی فارم جمع کرانے کے لیے مزید مہلت نہیں دی جائے گی۔

ضلع وائز صورتحال پر نظر ڈالیں تو تھانہ میں 38.77 فیصد، ممبئی شہر میں 37.57 فیصد، ممبئی مضافاتی علاقے میں 34.48 فیصد، پونہ میں 31.92 فیصد، ناگپور میں 30.32 فیصد اور پال گھر میں 28.88 فیصد گنتی فارم ابھی تک جمع نہیں ہوئے ہیں۔ اس کے برعکس ہنگولی میں 91.18 فیصد، بلڈھانہ میں 90.83 فیصد اور لاتور میں 89.21 فیصد فارم جمع ہونے کی اطلاع ہے۔

اسی طرح SIR کے اگلے مرحلے میں 24 اگست 2026 کو مسودہ ووٹر لسٹ (Draft Electoral Roll) جاری کی جائے گی۔ اس کے بعد ووٹروں کو اپنے نام اور تفصیلات کی جانچ کرنے اور دعوے و اعتراضات داخل کرنے کا موقع ملے گا۔ دعوے اور اعتراضات 24 اگست سے 23 ستمبر 2026 تک داخل کیے جا سکیں گے۔اگر کسی اہل ووٹر کا نام مسودہ ووٹر لسٹ میں موجود نہ ہو تو وہ فارم 6 کے ذریعے نام شامل کرنے کے لیے درخواست دے سکتا ہے۔ نام حذف کرنے کے لیے فارم 7 جبکہ پتہ، تصویر یا دیگر تفصیلات میں ترمیم کے لیے فارم 8 استعمال کیا جا سکتا ہے۔ یکم اکتوبر 2026 تک 18 سال کی عمر مکمل کرنے والے نئے ووٹر بھی مقررہ مدت میں اپنا نام درج کرا سکیں گے۔الیکشن کمیشن کے شیڈول کے مطابق دعوے اور اعتراضات کی جانچ کے بعد 27 اکتوبر 2026 کو حتمی ووٹر لسٹ جاری کی جائے گی۔ ایسے میں تمام ووٹروں کے لیے ضروری ہے کہ مسودہ فہرست جاری ہونے کے بعد اپنا نام، پتہ، تصویر اور دیگر تفصیلات لازماً چیک کریں، تاکہ کسی غلطی یا نام کے اخراج کی صورت میں مقررہ مدت کے اندر اصلاح یا اعتراض کیا جا سکے۔

Continue reading

Posted at 0

ناسک ضلع کلکٹر کو میونسپل کمشنر کا اضافی چارج سونپنے کی منظوری

مالیگاؤں: مالیگاؤں میونسپل کارپوریشن کے کمشنر رویندر جادھو کی جانب سے پیش کردہ درخواست پر مہاراشٹر حکومت کے شہری ترقیات محکمہ نے انہیں 9 روزہ ارجنٹ رخصت منظور کرلی ہے۔ اس سلسلے میں حکومت کی جانب سے باضابطہ حکم نامہ جاری کیا گیا ہے۔جاری کردہ حکم نامے کے مطابق کمشنر رویندر جادھو کو 17 اگست 2026 سے 25 اگست 2026 تک رخصت منظور کی گئی ہے۔ حکم نامے میں واضح کیا گیا ہے کہ مذکورہ مدت میں آنے والی 17، 22، 23 اور 24 اگست کی تعطیلات بھی رخصت کی مدت میں شامل ہوں گی۔حکومتی حکم کے مطابق یہ رخصت دیو درشن (مذہبی زیارت) کے مقصد سے منظور کی گئی ہے۔ کمشنر کو رخصت کی مدت کے دوران ہیڈکوارٹر چھوڑنے کی بھی اجازت دی گئی ہے۔کمشنر رویندر جادھو کی غیر موجودگی میں مالیگاؤں میونسپل کارپوریشن کے انتظامی امور کو جاری رکھنے کے لیے ناسک کے ضلع کلکٹر کو میونسپل کمشنر کے عہدے کا اضافی چارج سونپنے کی منظوری دی گئی ہے۔ اس طرح کمشنر کی رخصت کے دوران کارپوریشن کے اہم انتظامی و سرکاری امور کی نگرانی اضافی چارج سنبھالنے والے افسر کے ذریعے کی جائے گی۔

یہ حکم نامہ مہاراشٹر حکومت کے شہری ترقی محکمہ کی جانب سے جاری کیا گیا ہے۔ حکم نامے میں بتایا گیا ہے کہ یہ کارروائی گورنرِ مہاراشٹر کے احکامات کے تحت عمل میں لائی گئی ہے اور محکمہ کے ایڈیشنل چیف سیکریٹری کی جانب سے حکم جاری کیا گیا ہے۔حکم نامے میں کمشنر رویندر جادھو کے لیے رخصت سے متعلق انتظامی ضابطوں کی پابندی بھی لازمی قرار دی گئی ہے۔ انہیں رخصت پر روانگی کے وقت اور رخصت مکمل ہونے کے بعد دفتر میں دوبارہ حاضر ہونے پر عہدہ و ذمہ داری کی منتقلی کا سرٹیفکیٹ متعلقہ دفتر میں پیش کرنا ہوگا۔سرکاری حکم نامے کے مطابق کمشنر کی رخصت کی مدت 25 اگست 2026 تک مقرر ہے، جس کے بعد وہ اپنی ذمہ داریاں دوبارہ سنبھالیں گے۔

Continue reading
Subscribe to: Posts (Atom)

Random Posts