مشہور یوٹیوبر دھرو راٹھی نے اپنے یو ٹیوب چینل پر پابندی کا خدشہ ظاہر کیا

 

ملک آمریت کی طرف گامزن، حزب اختلاف لیڈران پر ای ڈی کی کارروائی مودی کے عدم تحفظ اور بزدلی کی علامت

برسر اقتدار کے قول و فعل اور غلط پالیسیوں پر مسلسل تنقید کرنے والے مشہور یوٹیوبر دھرو راٹھی نے اپنے یو ٹیوب چینل پر پابندی کا خدشہ ظاہر کیا ہے. راٹھی کی حالیہ وڈیو

Is India becoming a Dictatorship ?

وسیع پیمانے پر وائرل ہورہی ہے جسے 24 سے 25 میلین لوگوں نے دیکھا ہے. راٹھی نے حال ہی میں مشہور صحافی کرن تھاپر کے ساتھ ایک انٹرویو میں یہ خدشہ ظاہر کیا کہ ان کے یو ٹیوب چینل پر پابندی عائد کی جاسکتی ہے. راٹھی نے ملک کے وزیراعظم نریندر مودی کے خلاف بولنے پراپنے یو ٹیوب اکاؤنٹ پر پابندی کی پیشگی اطلاع دیتے ہوئے کہا کہ ہوسکتا ہے کل ان کے اکاؤنٹ پر پابندی عائد کر دی جائے.

راٹھی نے کہا کہ وزیراعظم نریندر مودی 70 سے 80 فیصد آمر بن گئے ہیں.انہوں نے مزید کہا کہ وہ دن دور نہیں جب ان کے یوٹیوب اکاؤنٹ پر پابندی عائد کر کے ان کی آواز کو خاموش کردیا جائے گا. اسلئے میں پہلے سے انتباہ دے رہا ہوں کہ ملک میں کیا ہورہا ہے. انہوں نے خبردار کیا کہ اس دن کا انتظار نہ کریں جب میرا چینل بند کر دیا جائے گا تب تک بہت دیر ہوچکی ہوگی. راٹھی نے 2 اپریل کو انڈیا گیٹ کی ایک ویڈیو پوسٹ کی تھی اور اس کا عنوان دیا تھا کہ ایک محب وطن کو اپنی حکومت کے خلاف اپنے ملک کا دفاع کرنے کے لیے ہمیشہ تیار رہنا چاہیے. 2024 عام انتخابات کے تناظر میں پوچھے گئے ایک سوال کے جواب میں راٹھی نے کہا کہ عوام کیلئے ان کا پیغام ہے کہ وہ ملک کی بقا کیلئے ووٹ کریں. انہوں نے مزید کہا کہ وہ مستقبل میں بھی ہر اس سیاسی جماعت کا بائیکاٹ کریں گے جو بھارتیہ جنتا پارٹی کی طرح کام کرنا شروع کرے گے. راٹھی کی ویڈیو کے مطابق حزب اختلاف سیاسی جماعتوں کے لیڈران پر ای ڈی کی کارروائی مودی کے عدم تحفظ اور بزدلی کو ظاہر کرتی ہیں.