پاپولر فرنٹ آف انڈیا سے منسلک 56.56 کروڑ روپے مالیت کی 35 غیر منقولہ جائیدادیں ضبط

مختلف ٹرسٹوں، کمپنیوں اور افراد کے نام پر رجسٹر، اب تک 61.72 کروڑ روپے کے اثاثے صبط

نئی دہلی: انفورسمنٹ ڈائریکٹوریٹ (ای ڈی) نے منی لانڈرنگ کی روک تھام قانون (پی ایم ایل اے) 2002 کی دفعات کے تحت مبینہ طور پر پاپولر فرنٹ آف انڈیا (پی ایف آئی) سے منسلک 56.56 کروڑ روپے مالیت کی 35 غیر منقولہ جائیدادیں ضبط کی ہیں۔ ضبط شدہ اثاثے مختلف ٹرسٹوں، کمپنیوں اور افراد کے نام پر ہیں لیکن مبینہ طور پر پی ایف آئی کی ملکیت ہیں۔

ان جائیدادوں میں سے 16 اکتوبر کو 35.43 کروڑ روپے مالیت کی 19 جائیدادیں ضبط کی گئی تھیں جبکہ 16 اپریل 2024 کو 21.13 کروڑ روپے مالیت کی 16 جائیدادیں ضبط کی گئی تھیں۔ ای ڈی کی یہ کارروائی نیشنل انویسٹی گیشن ایجنسی (این آئی اے) اور دیگر قانون نافذ کرنے والی ایجنسیوں کی جانب سے درج ایف آئی آر کی بنیاد پر کی گئی تحقیقات کے بعد کی گئی ہے، مالیاتی تحقیقاتی ایجنسی نے جمعہ کو یہ بات کہی۔

ضبط کی گئی جائیدادوں میں منجری میں ستیہ سرانی ایجوکیشنل اینڈ چیریٹیبل ٹرسٹ، کوزی کوڈ میں اوبیلسک پراپرٹیز اینڈ ڈویلپرز، کرونا ایجوکیشن اینڈ سوشل چیریٹیبل ٹرسٹ، کیرالہ میں رحمت ایجوکیشن چیریٹیبل ٹرسٹ اور دیگر ٹرسٹوں کے نام پر موجود زمین اور عمارتیں شامل ہیں۔ ان جائیدادوں کو مبینہ طور پر پی ایف آئی سے متعلق مختلف سرگرمیوں کے لئے استعمال کیا گیا تھا ، جس میں مذہب کی تبدیلی اور میٹنگیں بھی شامل تھیں۔

اس سے پہلے ای ڈی نے پی ایف آئی سے منسلک 5.16 کروڑ روپے کی جائیداد ضبط کی تھی جس میں 23 بینک کھاتے بھی شامل تھے۔ کل ضبطی اب 61.72 کروڑ روپے ہے۔