این سی پی (شرد چندر پوار) سے وزیراعلیٰ کا چہرہ کون؟

سانگلی اسلام پور میں عوامی ریلی سے شرد پوار نے واضح اشارہ دیا، ریاست کی تعمیر نو کا کام اپنے ہاتھ میں لینا ہوگا

مہاراشٹر: آئندہ اسمبلی انتخابات میں راشٹریہ وادی پارٹی(شرد چندر پوار) کی جانب سے وزیراعلیٰ کا چہرہ کون ہوگا اس تعلق سے بات چیت کے درمیان پارٹی سربراہ شرد پوار نے ریاست کے مستقبل کی تشکیل میں مہاراشٹر این سی پی-ایس سی پی کے صدر جینت پاٹل کے اہم کردار کا اشارہ دیا ہے۔

پوار نے اس بات پر زور دیا کہ ترقی یافتہ مہاراشٹر کی تعمیر نو کا سفر سانگلی کے اسلام پور سے شروع ہوگا اور جینت پاٹل کو ذمہ داری اپنے کندھوں پر لینی چاہئے اور پارٹی اور ان کے تمام ساتھی ان کی حمایت کریں گے۔ اس بیان سے اشارہ ملتا ہے کہ پاٹل آنے والے انتخابات میں اہم کردار ادا کرسکتے ہیں۔ بدھ کے روز مہاراشٹر کے سانگلی ضلع کے اسلام پور اسمبلی حلقہ میں ایک عوامی ریلی سے خطاب کرتے ہوئے شرد پوار نے کہا کہ مہاراشٹر کی خراب تصویر کو بدلنے کی ضرورت ہے۔ ہم ایک الگ مہاراشٹر چاہتے ہیں۔ اگر میں مختلف مہاراشٹر کہوں تو اس کا مطلب ہے کہ پہلے وزیر اعلی یشونت راؤ چوہان کے وژن کی طرح اور ایسا کرنے کے لئے وسنت نائک، راجا رام باپو وغیرہ جیسے بہت سے لوگوں نے قربانیاں دی ہیں۔ وہ سب ایک طاقتور اور مضبوط ترقی پسند ریاست چاہتے تھے۔ لیکن جو لوگ فی الحال اقتدار میں ہیں وہ مہاراشٹر کے مفاد میں بھی نہیں سوچتے ہیں۔ انہوں نے یہ بھی نشاندہی کی کہ آج صورتحال ایسی ہے کہ ریاست تمام شعبوں میں نچلی سطح پر  ہے۔ انہوں نے کہا کہ ایک وقت تھا جب مہاراشٹر ملک کی تمام ریاستوں میں سب سے اوپر تھا، اس لیے ہمیں ریاست کو دوبارہ ترقی یافتہ بنانے اور تعمیر نو کا کام اپنے ہاتھ میں لینا ہوگا۔

شرد پوار نے مزید کہا کہ مجھے خوشی ہے کہ یہ کام اسلام پور سانگلی سے شروع ہو رہا ہے۔ مجھے خوشی ہے کہ جینت پاٹل ریاست کے کونے کونے میں جا رہے ہیں۔ وہ لوگوں سے مل رہے ہیں، انہیں اعتماد دے رہے ہیں اور ہمارے نظریے کے بارے میں بتا رہے ہیں۔ مجھے یقین ہے کہ ریاست کے نوجوان ان کے ساتھ مضبوطی سے کھڑے ہوں گے اور مہاراشٹر کے بارے میں ہمارے جو خواب ہیں وہ پورے ہوں گے۔ آپ، میں اور مہاراشٹر کے سبھی لوگ توقع کرتے ہیں کہ وہ یہ ذمہ داری اپنے کندھوں پر لیں گے۔ ہمیں جینت پاٹل کی بھرپور حمایت کرنے کی ضرورت ہے۔